Pust je i ove godine platio za sve - prema ustaljenom običaju u Cresu je pjesmom, plesom i ćakulom na Rivi završio karneval, a u nastavku donosimo tekst "teštamenta" u kojem su pretresene aktualne gradske teme...
JURE: Frane ma je zima, cemo si popit jenu bevandicu?
FRANE: Daj, daj, neće nan naskodit sigurno..
(Valentina donosi bevandicu. Frane i Jure sjede ispred Burina i piju bevandu. Lijep je dan, ali jako hladan pa se malo jacuju.)
FRANE: Ma vidis ke lepi dan je deneska i vero nan je lepo ovdeka. Sada smo kako kušćarice na sencu.
JURE: Je lepo je ma je malo friško. Obrnulo je na buru, a i na Tramontani da je snega do kolen.
FRANE: Ne bacilaj za Tramontanu, oni ti se tamo snajdu i bez zimske službe. Sve ti moraju sami delat, i cistit sneg i pejat dec va škulu. Oni kako da su neki drugi svet, niki ne bacila za njih. Tamo ti je ako se spominješ one serije Život na sjeveru.
JURE: A ben, barem sada deca imaju produženi boravak va škulu, pa se ne moraju jacat venka a i mat i otac sad moreju neš kombinat pokle posla dok su im deca va škule, va toh produženi boravak.
FRANE: Je, da im je jako lepo, delaju zadaću,obedvaju, se malo igraju zes robotima.
JURE: Kakovi roboti, ce ganaš?
FRANE: Oni ti tan delaju zes meštricom, onon bjondon, šesnom nekakovi roboti, i onda ti sako toliko gredu na nekakova natjecanja. I da su jako pravi, aš sako toliko ćapaju neku nagradu i pehar.
JURE: Ja ti se va ti roboti niš ne kapin, to ni za nas!!! A si cul, već kada smo kod škuli da je ona nevesta od naše dožupanice dobila delo va škule? I da je sila prava i da ju deca voliju jako.
FRANE: Je to san cul, ali san cul da je dobila delo kako bi mogli platit pir. Da je bil vero lepi i veli pir. To ti siguro sila košta.
JURE: A more bit. Nego hebaj. Onoh naš vrtić da je imal neku velu aferu. Da se govorilo da sila judi ki tamo delaju će ostat bez dela.
FRANE: Ne bacilaj, niki neće ostat bez dela. To su ti oni na komunu udelali jednu velu pizdariju. Kako prvo, niki ni znal ki će bit na vlasti, pa su ti se nekako dogovorili i sve su zmešali. Oni ki su bili zajedno na izborima sada su kontra njihovih, a oni ki su bili druga banda sada ti se buševaju i jako vole. Onda nisu znali ce bi pa su brižnu mladu predcjednicu vjeća, dok je bila ća, kambjali zes onin drugim, malo starejim ki već pol života dela kako predcjednik vjeća. Su rekli da mladi nemaju iskustva u miješanju mutne kaše pa su stavili čovjeka s iskustvom.To ti je kako jedna meksička šapunaca. Onda nisu znali ce bi zes sobun pa su ti se ćapali vrtića. Nisu hteli platit judi ki tamo delaju aš su im šoldi rabili za druge stvari. Onda je to sve šlo po novinami pa su se svi skomešali, malo su ti se zesrali kako bi mi rekli i kambjali su politiku.
JURE: I su dobili plaće ti brižni judi iz vrtića ili su dobili otkaz?
FRANE: Dobili su plaće, trubilo!!!
JURE: A onoh mladi, lepi kjun ki sedi z bandi šindaka, ki je on?
FRANE: On ti je zamjenik gradonačelnika, ce ti vero niš ne kapiš. On ti je mlada snaga jake creske politike. On ti je i mali do šindaka. Kada šindako gre okol po svetu, onda ti mali tombulin gre delat sastanci mesto njega, gre pit i jest mesto njega. Ce ne vidiš da se lepo zaokružil!!!
JURE: Ma san cul da je i va crekve arival neki mladi, lepi pop? I da sada puno mladih gre va crekvu molit.
FRANE: To ti je sve programirano. Mladi kapelan = mladi va crekvu, puno ženskih okol crekve, a kede su ženske... tu pridemo anke mi. I sve je lepo, svi moliju,crekva je puna a plovan kuntenti.
JURE: Vidiš, na to nisan pensal, vero imaš prav. Vero ti že inteliđente.
FRANE: Va Cresu je pelno judi inteliđente. Si cul da na Plavice ti sada delaju kviz sako toliko, se spominješ Kviskoteke? Tako ti je sada tamo.
JURE: Ce i Mlakara su dvigli da pride u Cres?
FRANE: Ma neeee, mona... Tamo ti se organiziraju kviz-večeri. Onda ti se skupiju ekipe i rješavaju ti sila pitanja i odgovora. I ki najveć zna odgovori dobije i regal. I da su sila judi zainteresirani za to i da su jako pravi.
JURE: To ni za nas. Mi smo vavek va škule bili posejeni na ultimo banco. Se spominješ!?
FRANE: I novitadi su ti i va apoteke. Sada dela celi dan. Ti je prišla jena nova magistrica, onako drita i je stavila sve na red. Pelno judi ju hvali. Siguro zna dat i dobre medicine. Ce misliš da gren do nje ko bi mi preporučila neš za ono... znaš na ce mislim?
JURE: Da to san cul. Ma sen cul i da su apoteka i frizerski salon najposjećenije mesto va grade.
FRANE: Tako ti je to. Zdravlje i ljepota ti je na prvom meste. A i tamo ti se gana i cuješ štoriji do judi. Ne rabi ti Gugl!!!
JURE: I jedan Gugl ti je i onoh Kampanelo ki dela zes kopjuteri u Cresanki. On ti sve sada zna. On ti se razumije u politiku, ekonomiju, astrofiziku, novinarstvo.
FRANE: Je imaš prav. Ja sen cul da je toh isti sada službeni novinar Cresa. Kede je šal ovoh Svet!?
JURE: Si cul da na kampu delaju jedan veli bazen? Da ce to bit jedno velo cudo arhitekture! Bazen ce ti biti na prvom katu a šoto njega kuglana. I da ce to kostat sila soldi a brizni radnici na kampu nemaju kede parkirat auto kad pridu na delo.
FRANE: A forsi nece imat soldi za kuglanu pa ce ga napravit šoto bazena.
JURE: Dada, ma elektrovoda ima drugi plan, oni delaju bazen soto zemlje i veli morski akvarij.
FRANE: Ma ce to ganas? To ni bazen, tamo ce ti prit stambeni poslovni prostor.
JURE: Ma ki bude tamo delal, ce mu rabit anke i ronilacko odijelo!
FRANE: I palacu Moise su brzo finili..
JURE: A ne jos, tamo ima jos puno dela. Intanto su zabetonali stare zidin, onaj lepi starinski komad zida... a forsi ce se ovako boje konzervirat.
FRANE: Trubilo, to ti oni tako kazu, aš je lakse zabetonat sve i gotovo.
JURE: A kod kule ti je sve oprto, tamo nisu jos nis zabetonali.
FRANE: A ce bi ti zabetonal i konzerviral dreki trubilo??
JURE: A si cul da je Autotrans sada Arriva?
FRANE: Ma ki arivuje, kede je partil?
JURE: Ma niki ne arivuje, ni partiva, Autotrans ti je sada Arriva. To su ti sada Nijemci zeli. Sada i naš mehanicar mora nosit sljem i mora ganat njemacki. Sada i ja malo ucim njemacki, Hallo, vilkomen, aufiderzen!
FRANE: Viš, Autotrans Arriva - ariva, a Jadrolinija, non arriva mai! Kad je jadrolinija zela katamaran ponovno, finila je storja. Sad malo gre, malo ne gre.
JURE: To ti je kako Plodine, danas je akcija, sutra je skupo a preksutra prazna polica..
FRANE: Mali moj, sila robi rabi da bi se napelnila tako vela butega..
JURE: I ki ce to platit? Di su pare?
FRANE: Ma ne bacilaj, mi ti imamo soldi, mi ti delamo zes turisti... Kad je bil rukomet va zagrebu cijeli Cres je sal gjedat..
JURE: I naša klapa Teha je sla okolo... moramo ju pohvalit aš je sila nagradi ćapala.
FRANE: Ma one ti siguro delaju za Agrokor sada!
JURE: Ma kako to mislis?
FRANE: Ma sada su bile obelcene va Konzumike i Todorića, sikuro im delaju reklamu!
JURE: Ma mona trubilo, nis ne znas, to je karneval!!!
FRANE: Ma morali bi pohvalit i onih mladih ki su udelali film o nasoj skoli.
JURE: Ma ke videe? Forsi je reziser bil onoh špalanić.
FRANE: Ma kakovi Spalanic?
JURE: Ma to ti je na fejsu sve, i on ti dela nekakove filmici.
FRANE: Ma kakovi, kaovi filmici? Marija i ja bi pogli pogjedat to?
JURE: Nisi me kapil, to su filmici do festa pa ti stavi na fejsbuk.
FRANE: Aaa sad znan ce gjedas ti..ti si celi dan na tom fejsbuku.
JURE: Da, da, ma san anke vidil da su oni mladi do Hajduka udelali vele humanitzarne akcije za pomoc drugima. Imali su turnir u bocanju i nogometu i skupili su sila soldi za pomoc onima kima rabi.
FRANE: Ma viš ke pravi!
JURE: Njima bi trebalo dat da delaju feste, semenji i manifestacije, oni znaju kako se to dela.
FRANE: Je imas prav, as ona fumatapi zna sam prnest nekakovu mazurku da pjeva za Semenj.
JURE: Ma ce je to mazurka?
FRANE: Ma ona zena do onog pjevaca, niki je ne zna, Mazurkijevic, tako nes.
JURE: Aaa, zato je bilo slabo judi na festi.
FRANE: A ki bi pametni mogel festat jest i pit uz takovu muziku. Cemo vidjet za ovoh semenj kakovi skriveni umjetnik ce prit na Cres...
JURE: A skriveni umjetnik je i nas brizni pust. On ti se skril pokle jednog maskaranog tanca, nasli su ga skracenog na Pra. i znas da je zustal bez ruka.
FRANE: A ben sada ce rabit manje benzina za ga spalit.
JURE: Ma ce niki ne zna vero ki je to udelal nasem pustu? To je vela sramota..
FRANE: Ki zna, ki ne zna cemo procitat na instagramu..
JURE: Ma kakova je to novina, Instagram?
FRANE: To ti se na kompjuteru gjeda, jedna grupa ti je tamo kadesi.co, i tamo mores procitat sve ce nasi na Cresu delaju..
JURE: A forsi onda pise i do mene, do mene i moje Tonice??
FRANE: Ma ne budi govoril bedastoci, ki ce tebe i Tonicu gjedat.
JURE: Ma da imas pravo, ki ce o meni govorit..boje bi bilo da bimo popili jos jednu bevandu.
FRANE: Ala more jos ovu pa gremo pusta spalit..
JURE: Ala, ala mala, daj jos dve bevande i pust ce platit!!